A presidenta da Deputación de Pontevedra, Carmela Silva, visitou esta tarde no Auditorio Mar de Vigo a "Atlantic Area Annual Event", o evento anual do Interreg, no que se deu a coñecer o proxecto europeo IN 4.0, que lidera a institución provincial e conta cun orzamento de 2,5 millóns de euros. Este ano o encontro céntrase na innovación azul como motor principal para o crecemento sustentable na área atlántica, afondando nas claves da innovación da economía mariña, así como nas experiencias e boas prácticas desenvolvidas.

Para Silva, "que IN 4.0 poida estar aquí, entre outros dez proxectos, amosa a posición pioneira das iniciativas da Deputación a nivel europeo e mesmo internacional". Neste eido, a presidenta amosou a súa satisfacción porque "con proxectos como este demostramos que a Deputación de Pontevedra ten un firme compromiso cos sectores produtivos estratéxicos da nosa provincia, claves para o noso desenvolvemento económico, para a xeración de riqueza e creación de postos de traballo cualificados e de calidade".

En concreto, a través de IN 4.0 preténdese impulsar a dinamización e competitividade da industria naval da provincia de Pontevedra transformando o seu tipo de modelo nun negocio 4.0. Para elo, o proxecto conta con dez socios dos cales catro son españois, a Deputación de Pontevedra, Asime, Aclunaga e o Foro Marítimo Vasco; un de Portugal, Forum Océano; dous de Reino Unido, o Instituto de Investigación de Londres e o Departamento de Arquitectura Naval de Glasgow; dous franceses, o clúster do naval da Bretaña e o clúster industrial de Nantes, e un de Irlanda, o Instituto de Investigación de Cork.

Durante o "Atlantic Area Annual Evento" presentáronse algunhas das iniciativas que se están a desenvolver no marco do proxecto IN 4.0: IN 4.0 Connect. Máis polo miúdo, a presidenta da Deputación de Pontevedra deu a coñecer a nova plataforma IN 4.0 ligada á páxina web do proxecto. "Trátase dunha ferramenta online que pretende servir como punto de encontro para empresas do sector naval e empresas xeradoras de tecnoloxías da industria 4.0, así como para entidades de I+D do espazo atlántico europeo", informou a presidenta. Neste eido, IN 4.0 Connect proporciona un mapeo das empresas e promove o intercambio de experiencias e o networking con outros sectores industriais a través da ferramenta Business Roaming, que aglutina a máis de 51 asociacións e clústeres empresariais de 29 países co obxectivo de apoiar ás pymes na súa internacionalización.

O naval trátase dun sector fundamental para a economía da provincia de Pontevedra e dos países do espazo atlántico. En Galicia hai 270 empresas traballando no sector naval o que representa o 60 % da construción e reparación naval en España. No caso da provincia de Pontevedra, este sector creou no 2016 1.000 postos de traballo e na actualidade lidera a demanda de pedidos de todo o país.